Skóli!!

Já góðir hálsar, ég er að fara að hefja nám í fjarkennslu frá VMA. Ég fékk svar í dag að ég fengi inngöngu í mínar 10 einingar, mér finnst ég frekar heppin þar sem 100 aðrir eru á biðlista um að komast í fjarnám. Ég er sem sagt að fara í Íslensku 202, Ensku 303, Stærðfræði 202 og Bókfærslu 103. Þarf ég að borga "litlar" 49.650 krónur fyrir það. En reyndar, ef ég næ öllu (sem ég ætla að gera) þá fæ ég 45.000 krónur endurgreiddar. Sem er bara gott mál.
Annars þá er voða lítið að gerast þessa dagana bara vinna í Meleyri, sjoppunni og Þinghúsinu. Held reyndar að það sé alveg nóg. Er farin að verða það þreytt að ég er farin að sofa yfir mig þegar ég á að vera að vinna í Meleyri. Spurning hvort maður þurfi aðeins að læra að segja nei við vinnu....
Þetta kemur allt með kalda vatninu..................

Eymsli..

Já kvennareiðin var í gær og dagurinn í dag einkennist mikið af strengjum gjörsamlega alls staðar í líkamanum. Rassinn er til dæmis frekar sár. Svo var svo æðislegt veður að ég brann aðeins í sólinni en samt eiginlega bara vinstra megin. Oooog ég er með feita blöðru á neðri vörinni einnig vegna sólbruna. Og svo ofan á allt þetta þá haltra ég. Og ég skal segja ykkur út af hverju ég haltra.... Ég fór á föstudagskvöldið á rúntinn með Eydísi og Huldu, við fengum okkur smá bjór og sonna og svo fór ég bara heim. Ákvað samt að fá mér smá að éta þegar heim var komið. Jæja þegar ég hafði lokið við að snæða þá slekk ég ljósin og þá var þ.a.l. myrkur í öllu húsinu. Ég er varla lögð af stað úr eldhúsinu þá stíg ég á eitthvað sem ég veit ekki hvað var. Þannig að núna er ég bólgin með marblett á miðri ilinni. Ekki gott skal ég segja ykkur.
En annars þá komst ég alla leiðina í kvennareiðinni án þess að detta af baki, jibbý. Fór síðan að passa aðeins þessa yndislegu stráka sem Helga og Palli eiga. Og eftir það fór ég að vinna á barnum. Það var ekkert að gera, sem sagt bara fínt.
Jæja bless í bili...

Kvennareið!!

Jæja nú er kvennareiðin bara um næstu helgi. Ásta vinkona mín sem er 11 ára er búin að vera að reyna að hughreysta mig og segja mér að þetta verði ekkert mál. Það verði bara farið hægt yfir. Hún er búin að fara þessa leið einu sinni og þá hlýt ég að geta það. Ég er nú einu sinni 12 árum eldri en hún. Vááá, ég gerði mér ekki alveg grein fyrir að ég væri svona mörgum árum eldri. Eða frekar að hún væri svona mörgum áru yngri, það hljómar betur.
En annars þá er 17 helgar ballið sama dag og kvennareiðin og var ég búin að heyra að í svörtum fötum ætti að spila. En ég komst að því í dag, mér til mikilla vonbrigða að þeir verða ekki að spila, heldur Sniglabandið. Ég er jafnvel að hugsa um að fara ekkert á ball, ég er svo svekkt.
En gleðifréttir fyrir mig, ég losna við teinana fimmtudaginn 9. september klukkan 10.00. Ég get barasta ekki beðið. Búin að vera með þá í næstum því 2 ár og mér finnst eins og ég hafi fengið þá í síðustu viku.
Annars þá brunaði ég í bæinn föstudaginn síðasta og fór á djammið. Rosalega var það gaman. Ég var ekki búin að djamma í bænum í heila 3 mánuði. Hitti reyndar ekkert voðalega marga sem ég þekki en nokkra samt, þó þar hefðu verið sumir sem maður hefði bara alls ekkert viljað hitta. Það fá sko ekki að líða aðrir 3 mánuðir í næsta djamm í Reykjavíkinni. Svo á ég nefnilega eina vinkonu sem á það til að vera að röfla í ótrúlegasta fólki sem hún hittir, leigubílstjórum og fleirum sem er alveg sama hvað drífur á daga hennar. Hún er æði!!
Komið nóg í bili, kannski að ég fari að gera þessar magaæfingar sem ég ætlaði alltaf að gera á hverjum degi. Ég held ég sé búin að gera þær einu sinni í sumar, hehe....

Verslunarmannahelgin!

Ég skellti mér á Akureyri um helgina á Útihátíð. Eftir þessa helgi þá verð ég að segja að ég held ég fari ekki aftur á útihátíð. Kannski að ég prófi einhvern tímann að fara til Eyja einu sinni, fyrst að Sigrún systir gat verið þar alla helgina þá hlýt ég að geta það líka.
En um helgina... Ég fór á eitt ball með Pöpunum í Sjallanum sem var mjög skemmtilegt. Og svo kíkti ég á Kaffi Akureyri, það hefði getað verið mjög gaman ef að það hefði ekki verið svona mikið af fólki þar inni. Annars leið manni bara eins og hálfgerðum ellismelli þarna sem er ekki eðlilegt þar sem ég er bara 22 ára, ha!
Fólk var að drepast þarna hægri vinstri á tjaldsvæðinu og eru margir frekar útiteknir eftir að hafa sofið úti. Þannig að ef að ég fer ekki til Eyja á næsta ári þá verður það bara sumarbústaður eða ekki neitt.
Annars þá styttist í kvennareiðina og er ég frekar farin að kvíða fyrir henni heldur en hlakka til. Það verður nefnilega riðið svo ótrúlega langt. Alveg frá Refsteinsstöðum að Þverárrétt. Ég held ég verði sæmilega aum í rassinum eftir þá útreið.
En hef ekki tíma fyrir þetta lengur, þarf að fara út í sveit á hestbak, æfa mig meir................